Владыко Вседержителю, Господи многомилостивый, приими коленопреклонныя молитвы и смиренныя слезы наша, приносимыя пред Святым Алтарем Твоим в сие время беды и скорби народа Твоего. Приими предстательство всех святых сродников наших, коих на помощь призываем ныне, дабы свет любве Твоея, явленныя на Кресте Твоем, осиял всякаго человека страждущаго в мире сем, во тьме вражды и беззаконий сущем. Приими ходатайство святаго и благовернаго князя Владимира, крестителя и просветителя земли нашея; приими молитву страстотерпцев святых Бориса и Глеба, научающих не поднимати руки своея на брата своего; приими заступничество угодников Твоих Антония и Феодосия и с ними всех преподобных мужей и жен, слезами покаяния души свои паче снега убеливших; приими подвиги новомучеников и исповедников, страданиями своими спасительную веру в Тя нам сохранивших; приими прошения всех святых Церкве Твоея, трудами своими землю нашу освятивших. Наипаче приими молитвенный Покров Пресвятыя Матере Твоея, Владычицы нашея Богородицы и Приснодевы Марии, Ея же непостыдным предстательством люди Твоя многажды избавленни быша от всякия вражды и междуусобныя брани. Господи Иисусе Христе Боже наш, призри милостивным Твоим оком на скорбь и многоболезненный вопль чад Твоих, в земле украинстей сущих. Избави от междоусобныя брани, утоли кровопролитие, отврати належащия беды, лишенныя крова введи в домы, алчущия напитай, плачущия утеши, разделенныя совокупи, ожесточенных сердца умягчи и к Твоему познанию обрати, угаси всякую распрю, отыми соблазны. Яко Ты еси мир наш и Тебе славу возсылаем, Отцу и Сыну и Святому Духу, ныне и присно и во веки веков. Аминь.
Молитва Господу Иисусу Христу
Влады́ко Человеколю́бче, Царю́ веко́в и Пода́телю благи́х, разру́шивший вражды́ средосте́ния и мир пода́вший ро́ду челове́ческому, да́руй и ны́не мир рабо́м Твои́м, вкорени́ в них стра́х Твой и друг к дру́гу любо́вь утверди́: угаси́ вся́ку ра́спрю, отъими́ вся разногла́сия и собла́зны. Я́ко Ты еси́ мир наш и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.
Молитва к Богоматери
«Засту́пница Усердная, Мати Господа Вышнего, непреста́нная за нас моли́твенница, мир наро́дам у Го́спода испроси́, и примирения враждующим у Того, Кто отдал Сына Своего за спасение всех человеков». Ами́нь